Një ngjarje e rrallë ka ndodhur në kopshtin zoologjik të Fasanos, ku pas gati 50 vitesh ka lindur një gorillë.
Lajmi ka bërë menjëherë xhiron e rrjeteve sociale, pasi kjo është lindja e parë e këtij lloji në Itali pas gati gjysmë shekulli.
Vetë struktura dha njoftimin me emocion: “Kjo lindje nuk është vetëm një ngjarje unike, por përfaqëson edhe një fener shprese në rrugën drejt ruajtjes dhe mbrojtjes së specieve”.
Nëna, e quajtur Tamani po kujdeset për vogëlushin me gjithë dashurinë e saj, duke e mbajtur gjithmonë pranë, duke e përkëdhelur dhe mbrojtur. Pranë saj është babai, Nasibu. Bashkë me anëtarët e tjerë të grupit, ata formojnë sot familjen e parë të gorillave të strehuar ndonjëherë në Itali.
Ky moment është kurorëzimi i një rruge të gjatë. Pas vdekjes së Riù, gorillës që jetoi për vite i vetëm në Fasano, e ardhmja dukej e paqartë. Por në vitin 2024, në Kopshtin Zoologjik mbërriti një familje riprodhuese: Tamani me dy fëmijët e saj, e ndjekur më pas nga Nasibu, i ardhur nga Belgjika. Nga ajo kohë nisi një aventurë e re, që sot sjell një arritje historike për vendin.
Lindja e vogëlushit është jo vetëm një gëzim për Kopshtin e Fasanos, por edhe një mesazh i fuqishëm për të gjithë ata që punojnë çdo ditë në mbrojtje të biodiversitetit. Në një periudhë ku mbijetesa e gorillave është gjithnjë e më e rrezikuar, ky këlysh i lindur është një shpresë e re për të ardhmen e specieve.
