Kryetari i Partisë Demokratike të Kosovës, Memli Krasniqi ka konfirmuar ditën e sotme se do të marrë pjesë në takimin e thirrur nga presidentja Vjosa Osmani lidhur me ngërçin politik dhe moskonstituimin e Kuvendit. Krasniqi është shprehur se ata e kanë kërkuar edhe më herët përfshirjen e saj për të gjetur një zgjidhje mbi situatën aktuale politike.
Ai tha se angazhimin e presidentes e sheh si pozitiv, por shprehi skepticizëm për mundësi të rezultatit nga ky takim.
“Kam pranuar ftesë. Nesër është takimi dhe unë do të jem aty. Qëndrimi që e kemi pasur gjithmonë. Ne ka dy tre muaj që po mundohemi që të gjejmë zgjidhje për të ofruar kompromise për të dalë nga kjo situatë. Nesër do të jem te presidentja. Ne kemi pasur kërkesë qysh herët që presidentja të involvohet”, tha Krasniqi.
Këshilltari për media i presidentes, Bekim Kupina njoftoi dje se Osmani, do t’i ftojë udhëheqësit e partive politike në takime në ditët në vijim, për të diskutuar për konstituimin e Kuvendit të Kosovës. Kushtetuesja, në aktgjykimin e publikuar më 26 qershor, kërkoi nga deputetët e dalë nga zgjedhjet e shkurtit, që brenda 30 ditësh të konstituojnë organin ligjvënës.
Megjithatë, Lëvizja Vetëvendosje ka thënë se aktgjykimi lejon votimin e fshehtë për kryeparlamentarin, ndërsa Partia Demokratike e Kosovës, Lidhja Demokratike e Kosovës dhe Aleanca për Ardhmërinë e Kosovës kanë argumentuar të kundërtën. Presidentja Osmani ishte shprehur e gatshme t’i drejtohej Gjykatës Kushtetuese edhe pas një takimi konsultativ që kishte pasur me krerët politikë më 15 maj.
