Me hyrjen në fuqi të vitit 2026, skema e pensioneve pëson ndryshime të reja, duke prekur si moshën e daljes në pension për gratë, ashtu edhe vitet e vjetërsisë në punë për të dyja gjinitë. Këto ndryshime janë pjesë e reformës së miratuar në vitin 2015, e cila parashikoi një rritje graduale të këtyre kritereve ndër vite.
Sipas rregullave të reja, gjatë vitit 2026 gratë duhet të kenë mbushur moshën 62 vjeç për të dalë në pension. Ligji “Për sigurimet shoqërore” përcakton që mosha e pensionit për gratë të rritet me dy muaj çdo vit, deri sa të arrijë 63 vjeç në vitin 2032. Pas kësaj periudhe, rritja e moshës do të përfshijë edhe burrat, me synimin që për të dyja gjinitë mosha e pensionit të unifikohet në 67 vjeç deri në vitin 2056.
Ndërkohë, edhe pse mosha e pensionit për burrat mbetet aktualisht e pandryshuar, ata preken nga rritja e kërkesës për vjetërsinë në punë. Nga 1 janari 2026, një burrë duhet të ketë 39 vite sigurimi për të përmbushur kriteret, krahasuar me 35 vite që kërkoheshin deri në fund të vitit 2014. E njëjta rritje graduale e vjetërsisë zbatohet edhe për gratë, paralelisht me rritjen e moshës së daljes në pension.
Sipas legjislacionit në fuqi, vitet e sigurimit kanë ndikim të drejtpërdrejtë në masën e pensionit të pleqërisë. Pensioni llogaritet mbi bazën e një shume fikse, të barabartë me pensionin social, e cila shumëzohet me vitet e sigurimit dhe pjesëtohet me vitet e kërkuara të vjetërsisë në punë.
Kriteret për vitin 2026:
- Mosha e daljes në pension
- Burra: 65 vjeç
- Gra: 62 vjeç
- Vjetërsia në punë
- Viti 2025: 38 vjet e 8 muaj
- Viti 2026: 39 vjet
