Policia e Kavajës ka zbuluar një qendër prostitucioni në Qerret dhe ka arrestuar dy shtetase kineze, të dyshuara për veprën penale “Prostitucioni”.
Në kuadër të operacionit “Baza” u bë arrestimi i shtetasve kineze C.Y., 42 vjeçe dhe Y. Sh., 41 vjeçe, njofton policia.
Gjithashtu u proceduan penalisht në gjendje të lirë për të njëjtën vepër penale 6 shtetas shqiptarë, klientë që dyshohet se kanë përfituar shërbime seksuale kundrejt pagesës.
Nga hetimet rezultoi se dy shtetaset e huaja kishin marrë me qira një apartament në Qerret dhe, përmes komunikimeve në rrjetet sociale, siguruan klientë, duke ofruar shërbime seksuale kundrejt vlerave monetare nga 80 deri në 200 euro.
Dy shtetaset kishin hyrë në Republikën e Shqipërisë si turiste, ndërsa në realitet ushtronin aktivitet të paligjshëm me qëllim përfitimi financiar.
Në cilësinë e provës materiale u sekuestruan shuma parash në euro dhe dollarë dhe 2 telefona celularë, të përdorur për komunikime me klientët.
