Kryebashkiaku i Tiranës, Erion Veliaj ka vijuar sulmet ndaj prokurorit të dosjes në ngarkim të tij Ols Dado. Në një intervistë të transmetuar këtë të enjte në “Report Tv”, Veliaj pretendon se prokurori Ols Dado është në konflikt interesi, ndërsa nuk i ka ndaluar edhe këtë herë etiketimet negative ndaj tij.
Pyetjes “a është në konflikt interesi me ju prokurori Ols Dado? Përgjatë një viti hetimi, pse nuk reaguat? A ka pasur më herët komunikime ndërpersonale me ju prokurori”, Veliaj iu përgjigj:
“Olsi Dado është në konflikt interesi 24h në 24! Ka kërkuar si Gobsek i pangopur metra shtesë, që nuk i takojnë, dhe nuk i ka marrë. Unë më mirë bëj burg të padrejtë, se të shkel ligjin, që Olsi të marrë kate shtesë, që nuk i takojnë, te Rruga e Kavajës. S’kam reaguar për 1 vit hetim? Po unë jam shpallur në hetim ditën që jam ndaluar. Ols hileqari as nuk e regjistroi emrin, as veprën! Si të reagoja në parathënie?
Më akuzon Nesti Angoni që s’ekziston, më shpallin “i dënuar” që në faqen e parë të dosjes dhe më thonë “nuk pendohet” në faqen e fundit. Kujt politikani tjetër i është bërë 20 vjet veting? Mbi ç’bazë? Nga 24 deri në 44 vjeç! Po! Ka pasur komunikime. E pranoi edhe vetë në seancë! Siç pranoi edhe “se ta tregoj unë ty, e di ku vete”. Ku është parë kjo që një noter nga babi me 5-a, gdhihet prokuror nga krevati dhe i thotë kryetarit të Bashkisë “ta tregoj unë ty”, që s’me dhe metrat e babëzisë së madhe”.
Ai thumboi dhe kreun e SPAK Altin Dumani.
Në përgjigje të pyetjes “pse nuk keni përmendur në asnjë reagim tuajin Altin Dumanin”, Veliaj tha:
“Sepse ende lus Perëndinë që një ditë do kuptojë se si po përdoret nga vartësit mediokër e hakmarrës për hesapet e tyre personale. Po e përdorin si Pilatin për Barabën. Zoti e ndriçoftë”!
