Nga 7 janari, turistët që duan të vizitojnë Shatërvanin e Trevit në Romë do të përballen me një tarifë prej dy eurosh, ndërsa vendasit do të vazhdojnë të kenë akses falas. Kjo masë, sipas Corriere della Sera, pritet t’i sjellë qytetit rreth 20 milionë euro. Prej një viti, hyrja në zonë është e kufizuar në 400 vizitorë në një kohë, dhe vitin e ri do të sjellë dy korridore të ndara: një për romakët dhe një për turistët. Pagesat do të mund të realizohen edhe me karta krediti.
Këshilltari për Turizmin dhe Ngjarjet e Mëdha, Alessandro Onorato, e mbështet këtë vendim, duke e parë si një mënyrë për të mbrojtur Shatërvanin, i cili është një kryevepër barokut të vonë nga Nicola Salvi. Vetëm në gjashtë muajt e parë të vitit aktual, ai u vizitua nga mbi 5.3 milion njerëz, më shumë se Panteoni gjatë gjithë vitit 2024.
Megjithatë, është e rëndësishme të theksohet se vendosja e tarifës është ende një hipotezë dhe nuk ka pasur një vendim të qartë apo data zyrtare. Ndërkohë, organizata Codacons ka shprehur kundërshtimin e saj ndaj kësaj mase, duke theksuar se monetizimi i monumenteve dhe shesheve historike nuk është i drejtë. Ata argumentojnë se vizitorët duhet të kenë mundësi të shijojnë bukuritë e Romës pa pagesë dhe shprehin dyshime në lidhje me mënyrën se si do të përdoren fondet e mbledhura.
Sidoqoftë, Codacons është përkrahës i kufizimeve të hyrjeve për të luftuar mbipopullimin dhe degradimin, duke parë aksesin e kontrolluar si një zgjidhje për të përmirësuar përvojën e vizitorëve. Kjo situatë rrit shqetësimet dhe diskutimet mbi balancën midis ruajtjes së trashëgimisë kulturore dhe nevojave ekonomike të qytetit.
