Lionel Messi, Luis Suarez dhe Neymar sërish bashkë? MSN, i cili dominoi në Europë, duke udhëhequr Barcelonën të fitonte gjithçka më 2015 dhe arriti 364 gola e 173 asistime në përgjithësi, mund të rikompozohet në Miami.
“Natyrisht, duke luajtur me Messin dhe Suarez përsëri do të ishte e pabesueshme, – tha Neymar për “CNN Sport”, pasi fitoi çmimin e karrierës së lojtarit në edicionin e fundit të “Globe Soccer”. – Ata janë miqtë e mi, ende flasim me njëri-tjetrin. Do të ishte interesante ta ringjallja këtë treshe. Jam i lumtur tek Al Hilal, ndihem mrekullisht në Arabinë Saudite, por kush e di. Futbolli është plot surpriza”.
Një eventualitet i refuzuar nga Mascherano për shkak të çështjes së njohur si “tavani i pagave” të MLS-së, por Suarez e shpreson këtë: “Të gjithë e dinë se çfarë është Ney si lojtar, çfarë bëmë në periudhën që ishim bashkë.
Sot jemi në një epokë ndryshe dhe shumë më të vjetër, por është gjithmonë emocionuese të kesh një lojtar si Ney, cilësinë që ai mund t’i sjellë skuadrës. Në futboll çdo gjë mund të ndodhë, por e dimë që nga këtu deri në realitet është e vështirë, shumë e ndërlikuar”.
Synimi i Kupës së Botës për Klube: “Ne jemi të entuziazmuar që mund të luajmë një turne kaq të madh, një Kupë Bote për Klube. Do të shohim se si do të arrijmë në atë fazë të sezonit, skuadrat e MLS do të duhet të përballen me klubet e mëdha të huaja”.
