Për javën që nis sot, pritet që vendi të ndikohet nga kushte relativisht të paqëndrueshme të motit.
Ditën e sotme, 10 shkurt 2025 e hënë, moti ishte kryesisht i kthjellët, me disa vranësira kalimtare gjatë ditës, ndërsa pasdite dhe në mbrëmje ka një shtim të vranësirave.
Nga e Marta e nesërme e deri të Mërkurën, priten alternime kthjellimesh dhe vranësirash, veçanërisht nga ora 12:00, ku shoqërohen me reshje shiu. Fillimisht, reshjet do të jenë më të shpeshta përgjatë vijës bregdetare dhe do të përhapen më pas në jug dhe pjesërisht në qendër. Intensiteti i reshjeve do të jetë kryesisht i ulët, por lokalisht mund të jetë mesatar, veçanërisht në jug. Në lartësitë malore priten reshje bore me intensitet të ulët.
Për ditën e Enjte, moti do të jetë i vranët, me intervale kthjellimesh. Vranësirat do të intensifikohen gjatë pasdites dhe shoqërohen me reshje shiu me intensitet të ulët, fillimisht përgjatë vijës bregdetare, dhe më pas do të përhapen në pjesën më të madhe të territorit. Në veriperëndim dhe pjesërisht në qendër, reshjet mund të jenë më të forta hera-herës, në formën e shtrëngatave afatshkurtra.
Për ditën e Premte, moti pritet të jetë i vranët, me alternime kthjellimesh herë pas here. Reshjet, që do të jenë të dobëta, do të fillojnë që në orët e para të ditës, ndërsa në veri dhe pjesërisht në qendër, intensiteti mund të arrijë mesatar. Në lartësitë mbi 700-800 m, do të ketë reshje bore me intensitet të ulët.
Era pritet të fryjë nga juglindja dhe verilindja, veçanërisht të enjten dhe të premten, me shpejtësi deri në 8 m/sek, ndërsa përgjatë vijës bregdetare dhe në lugina, era mund të arrijë deri në 20 m/sek kur formohen vranësirat.
