Prestigjozja “Al Jazeera” njoftoi vdekjen e pesë anëtarëve ekipit të saj të lajmeve, përfshirë një korrespondent të njohur. Ekipi u vra kur ushtria izraelite “shënjestroi” një tendë që ata po përdornin në qytetin e Gazës.
Anas al-Sharif dhe Mohammed Qurayqa, gazetarë, si dhe Ibrahim Zaher, Mohammed Noufal dhe Moamen Aliwa, kameramanë të Al Jazeera-s , humbën jetën tragjikisht nga sulmi i izraelitëve.
Ndërkohë nga ana tjetër këta të fundit konfirmuan se shënjestër e këtij sulmi ishte Anas al-Sharif i cili sipas tyre ishte një “terrorist” që po hiqej si gazetar.
Përmes një postimi në “Telegram”, pala izraelite tha: “sulmi synonte terroristin Anas al-Sharif, i cili po hiqej si gazetar i Al Jazeera-s“, duke pretenduar se “ai ishte udhëheqësi i një qelize terroriste të organizatës terroriste Hamas”, përgjegjëse “për përgatitjen e sulmeve me raketa kundër civilëve dhe ushtarëve izraelitë”.
28-vjeçari ishte një nga figurat më të njohura midis korrespondentëve të rrjetit në gjuhën arabe në Rripin e Gazës , duke mbuluar luftën që shpërtheu më 7 tetor 2023, në hakmarrje për një sulm të paprecedentë nga krahu ushtarak i lëvizjes islamiste palestineze Hamas në Izraelin jugor.
