Qeveria e Nepalit ka vendosur të heqë bllokimin e rrjeteve sociale pas protestave masive që lanë pas vetes 19 të vdekur dhe mbi 100 të plagosur në të gjithë vendin.
Autoritetet kishin ndaluar 26 platforma, përfshirë Facebook, Instagram, X (Twitter), YouTube dhe WhatsApp, duke kërkuar që ato të regjistroheshin zyrtarisht në Nepal. Ky vendim u perceptua si cenzurë dhe ndezi pakënaqësi të gjerë, veçanërisht te të rinjtë e ashtuquajtur “Brezi Z”, të cilët organizuan protesta të fuqishme në kryeqytet dhe qytete të tjera.
Ministri i Komunikimit dhe Teknologjisë së Informacionit, Prithvi Subba Gurung, konfirmoi rikthimin në funksion të rrjeteve sociale, duke deklaruar:
“Ne kemi tërhequr bllokimin e rrjeteve sociale. Ato janë duke funksionuar tani.”
Kryeministri K.P. Sharma Oli shprehu keqardhje për dhunën dhe humbjen e jetëve njerëzore, ndërsa premtoi kompensim për familjet e viktimave dhe trajtim falas për të plagosurit. Ai njoftoi gjithashtu ngritjen e një komisioni hetimor 15-ditor për të zbardhur shkaqet e ngjarjes dhe për të nxjerrë masa parandaluese.
Dhuna shpërtheu pasi policia përdori gaz lotsjellës, plumba gome dhe armë zjarri ndaj protestuesve, duke shkaktuar viktima dhe dhjetëra të plagosur. Si pasojë e presionit publik, ministri i Brendshëm Ramesh Lekhak dha dorëheqjen.
Organizatat ndërkombëtare të të drejtave të njeriut, përfshirë edhe OKB-në, kanë kërkuar një hetim të pavarur mbi përdorimin e tepruar të forcës nga autoritetet nepaleze
