Përfaqësues të partive politike, organizatave të shoqërisë civile dhe mediave nënshkruan zyrtarisht Kodin e Sjelljes për Përdorimin e Përgjegjshëm të Rrjeteve Sociale me qëllim për të siguruar një fushatë të qetë dhe të respektueshme për zgjedhjet lokale në Kosovë. Kjo nismë u realizua në bashkëpunim me Demokraci për Zhvillim (D4D) dhe Qendrën për Dialog Humanitar (HD) dhe përfaqëson vazhdimin e një partneriteti që kishte startuar gjatë zgjedhjeve lokale të vitit 2021.
Ceremonia e nënshkrimit, në të cilën mori pjesë edhe Telegrafi.com, theksoi rëndësinë e krijimit të një hapësire online që nxit respektin dhe transparencën. U shpreh se debati politik dhe mospajtimet janë elemente të natyrshme të demokracisë, por që duhen zhvilluar me përgjegjësi.
Kodi i Sjelljes përcakton disa parime themelore, duke përfshirë respektin për ligjet zgjedhore dhe standardet etike, ndalimin e dezinformimit dhe gjuhës së urrejtjes, si dhe nxitjen e një dialogu konstruktiv ndërmjet partive, mediave dhe qytetarëve. Një fokus i veçantë është garantimi i pjesëmarrjes së barabartë për gratë, pakicat dhe grupet e margjinalizuara.
Një aspekt i rëndësishëm është monitorimi i hapësirës digjitale, i cili do të realizohet nga një staf i dedikuar dy javë para fillimit të fushatës dhe gjatë gjithë kohëzgjatjes së saj. Monitorimi do të përfshijë identifikimin dhe dokumentimin e shkeljeve të Kodit, sidomos në lidhje me dezinformimin dhe ngacmimin. Pas zgjedhjeve, do të publikohen raportet javore dhe një raport përfundimtar.
Për organizatorët, qëllimi kryesor i këtij kodi është mbrojtja e integritetit të diskursit demokratik dhe krijimi i një mjedisi online të sigurt e gjithëpërfshirës. Partitë që nuk arritën të ishin të pranishme në këtë event kanë mundësinë të kontaktojnë D4D për të nënshkruar Kodin dhe për të treguar angazhimin e tyre ndaj standardeve të vendosura.
