Qarku i Beratit është prekur gjatë fundjavës nga kushte të keqija atmosferike, me shi dhe erëra të forta që shkaktuan ndërprerje të energjisë elektrike në disa zona malore. Sipas OSHEE-së, stuhia që ka përfshirë rajonin ka dëmtuar rëndë rrjetin shpërndarës në nënstacionin e Çorovodës, duke shkaktuar daljen jashtë funksionit të disa kabinave elektrike.
Në fshatrat Leshnjë, Potom, Kostren dhe Tomor, më shumë se 40 abonentë janë pa energji elektrike, ndërkohë që në Kuçovë, era e fortë dhe shirat e bollshëm kanë dëmtuar fidrin e nënstacionit të qytetit, duke lënë 200 abonentë pa drita në zonën Gegë-Frashër. Si pasojë e këtyre dëmtimeve, 6 kabina elektrike kanë dalë jashtë funksionit.
OSHEE-ja ka njoftuar se grupet e punës po riparojnë linjat e dëmtuara me qëllim rikthimin e energjisë elektrike, duke pasur parasysh edhe temperaturat e ulëta që priten gjatë ditëve në vazhdim.
Sipas kompanisë, problemet e tilla janë shpesh të lidhura me amortizimin e rrjetit elektrifikues dhe mungesën e investimeve në infrastrukturë gjatë viteve të fundit.
Po ju a keni probleme me energjinë elektrike? Na raportoni duke na shkruar!
