Ish-sulmuesi italian Luca Toni, i ftuar në podkastin “Cose Scomode” të Aura Sport, ka folur me superlativa për ndikimin e Luka Modrić në Serie A, duke e cilësuar kroatin si transferimin më të goditur të vitit 2025.
“Modrić është blerja më e mirë e 2025-ës sepse ka sjellë cilësi. Kemi parë që kampionët, edhe në moshën 38 apo 39 vjeç, mund të luajnë në Itali me ‘cigaren në gojë’. Ai mund të kishte shkuar në Emiratet e Bashkuara për të fituar një pasuri, por zgjodhi të sfidojë veten. Është pak a shumë si rasti i De Bruyne, edhe pse ndikimi ka qenë ndryshe,” u shpreh Toni.
Vlerësime në të njëjtën linjë dha edhe ish-portieri Sébastien Frey, i njohur për periudhën e tij te Fiorentina. Sipas tij, ardhja e Modrić në kampionatin italian është një lajm i madh për çdo adhurues futbolli.
“Për mua, Modrić ka qenë blerja më e mirë në Serie A këtë vit. Për këdo që e do futbollin, ardhja e Modrić… po flasim për një kampion. Kampionët ndonjëherë shkojnë të luajnë diku tjetër, por një kampion që, pavarësisht historisë së tij te Real Madridi, vjen të luajë në Itali, te AC Milan, një klub i madh, dhe ta shohësh ende duke luajtur kështu është e mrekullueshme,” tha Frey.
