Një humbje e madhe ka prekur sot komunitetin akademik dhe studentor në Universitetin e Tiranës. Prof. Fatmir Memaj, zëvendësdekan dhe një prej pedagogëve më të vlerësuar të Fakultetit të Ekonomisë, është ndarë nga jeta në orët e para të mëngjesit. Lajmi i trishtë është konfirmuar nga familjarët dhe kolegët e tij të shumtë, të cilët sot janë të pikëlluar nga kjo humbje e parakohshme.
“Me hidhërim të thellë, familja ju njofton se në orët e para të mëngjesit të sotëm u nda nga jeta para kohe Profesor Fatmir Memaj”, thuhet në deklaratën zyrtare të familjes.
Profesor Memaj ishte një figurë e respektuar dhe e dashur për breza të tërë studentësh. Ai njihej për përkushtimin ndaj mësimdhënies, profesionalizmin dhe mbështetjen e vazhdueshme ndaj kolegëve të rinj në Fakultet. Lëndët që ai mbulonte – statistika, demografi dhe metoda kërkimi – ishin ndër më të vështirat, por ai arrinte t’i bënte të kuptueshme me një qasje njerëzore dhe gjithmonë të qetë.
Përtej auditorit, Fatmir Memaj përballoi një dhimbje të madhe personale që nga viti 2016, kur humbi të birin, Aleksin, në moshën vetëm 14-vjeçare. Pas një beteje të gjatë me një sëmundje të rëndë, e cila mobilizoi një fushatë të gjerë ndihme nga studentë, kolegë dhe qytetarë, Aleksi nuk arriti të mbijetonte. Kjo ngjarje e rëndë la një plagë të pashëruar në jetën e profesor Memajt, një dhimbje që ai e mbante me dinjitet, duke vijuar të ishte prezent dhe mbështetës për të gjithë ata që e rrethonin.
Sot, profesor Memaj është kujtuar me respekt, dashuri dhe lot nga të gjithë ata që patën fatin ta njohin. Kolegët shprehen se, ndoshta, lutjet e tij të përditshme për t’u ribashkuar me të birin janë dëgjuar.
