Çifti tajlandez që theu rekordin Guinness për puthjen më të gjatë në vitin 2013, është ndarë pas shumë vitesh bashkë.
Ekkachai dhe Laksana Tiranarat u bënë pjesë e historisë me një puthje që zgjati plot 58 orë e 35 minuta, duke kaluar rekordin e mëparshëm të tyre prej 46 orësh e 24 minutash në vitin 2011.
Sipas The Independent, 56-vjeçari Ekkachai konfirmoi ndarjen në një intervistë për BBC News World Service, duke shprehur krenarinë për rekordin e tyre dhe dëshirën për të ruajtur kujtimet e bukura nga ajo përvojë unike.
Puthja historike u zhvillua në Pattaya të Tajlandës, duke nisur më 12 shkurt 2013 dhe përfunduar në Ditën e Shën Valentinit. “Ishte një përvojë e papërsëritshme. Kaluan shumë vite të bukura bashkë dhe do të mbaj gjithmonë në zemër atë që arritëm,” tha Ekkachai.
Edhe pse nuk kanë zbuluar arsyet e ndarjes, ai theksoi se mes tyre mbizotëron ende respekti dhe kujdesi për njëri-tjetrin.
Konkursi ishte një sfidë më vete: ata duhej të vazhdonin puthjen edhe gjatë pushimeve për në tualet, ndërsa ujin duhej ta kalonin gojë më gojë. Pavarësisht këtyre vështirësive, çifti u rikthye pas humbjes në vitin 2012, të vendosur për të fituar.
“Duhej të qëndronim drejt si statuja. Kur na zinte gjumi, në vend që të pickonim njëri-tjetrin, na mjaftonte një prekje e butë në kokë ose një përqafim,” kujtoi ai.
Çmimi për triumfin e tyre përfshinte dy unaza diamanti dhe 100,000 baht (rreth 3,000 dollarë). Por kur gjithçka mbaroi, lodhja ishte e madhe.
“Nuk doja më të rrija në këmbë. Doja vetëm të pushoja dhe të pija ujë,” përfundoi Ekkachai.
Një histori dashurie dhe vendosmërie që, pavarësisht përfundimit, mbetet një dëshmi e fuqisë së lidhjeve njerëzore dhe sakrificave për të arritur një qëllim të përbashkët.
