Kryetari i Partisë Demokristiane, Nard Ndoka, ka deklaruar se zgjedhjet janë zhvilluar në një terren tërësisht të pabarabartë.
Ai ka akuzuar kryeministrin Edi Rama për manipulim të opinionit publik, duke thënë se edhe sondazhet “exit poll”, të publikuara pas përfundimit të votimeve, janë të porositura dhe të paguara nga mazhoranca.
Sipas Ndokës, rezultatet e këtyre sondazheve i kishte marrë në telefon tre orë përpara publikimit zyrtar.
Pjesë nga fjala:
“Një proces normal duhet të jetë i lirë, i barabartë dhe i ndershëm. Ne nuk patëm asnjë prej këtyre. Kishim një mazhorancë që ka shkelë çdo ligj zgjedhor, e fundit ishte falja e gjobave. Ka një shpërblim për pensionistët… unë po them për ato që janë në fletoren zyrtare. Mund të numërohem mbi 115 shkelje vetëm gjatë fushatës elektorale. Jo vetëm që nuk janë të barabarta, por ka pasur një hendek shumë të madh.
Unë shoh një mazhorancë në panik. Këtu janë të porositura edhe sondazhet edhe “exit pollet”. Ato që dolën unë e kisha në telefonin tim që para 3 orëve. Pjesë e stafit të tyre na e kanë shpërnda se kemi edhe ne njerëzit tonë. Magjia që bëjnë këta ustallarë, edhe votën e blerë e përfshijnë në këto sondazhe.”
