Delina Ibrahimaj, ministre e Ekonomisë dhe Inovacionit ka komunikuar vendimet e mara pas përfundimit të mbledhjes së qeverisë.
Ministrja theksoi se situata ndërkombëtare, e ndikuar nga zhvillimet në Lindjen e Mesme dhe bllokimi i Ngushticës së Hormuzit, ka pasur ndikim të drejtpërdrejtë në tregjet globale të energjisë, duke reflektuar luhatje të vazhdueshme të çmimeve edhe në vend. Sipas saj, qeveria ka mbajtur një vëmendje të shtuar ndaj kësaj situate, duke analizuar në mënyrë të vazhdueshme tregun dhe duke ndërhyrë sa herë është parë e nevojshme.
Ibrahimaj: Që prej fillimit të luftës në Lindjen e Mesme dhe prej bllokimit të Ngushticës së Hormuzit, sa herë që këshilli i Ministrave mblidhet diskuton mb zhvillimet më të fundit dhe mbi nevojat që ka për ndërhyrje në lidhje me ndryshimet e çmimeve. Ju keni parë sa aktiv ka qenë Bordi i Transparencës në lidhje me përcaktimin e çmimeve të naftës, ditën e djeshme bëmë një ulje domethënëse të çmimit duke e çuar çmimin e naftës në 210 lekë. Ndërkohë që në bazë ditore ne monitorojmë çmimet, me qëllim që të garantojmë që çmimet në tabelë janë ato që reflektojnë zhvillimet më të fundit.
Ministrja Ibrahimaj u ndal edhe te ecuria e çmimeve të produkteve ushqimore, duke theksuar se gjatë ditëve të fundit, që prej mesit të muajit mars, është vënë re një rritje e çmimeve të frutave dhe veçanërisht të perimeve. Ajo bëri të ditur se inflacioni për muajin mars ka shënuar nivelin 2.6%, me një rritje të lehtë në tërësi.
Sipas saj, institucionet kanë monitoruar vazhdimisht çmimet që prej fillimit të krizës, duke ndjekur në mënyrë të përditshme rreth 80 produkte të shportës në Tiranë dhe në qarqe të tjera të vendit.
Ibrahimaj: Ditën e fundit, që nga mesi i muajit mars kemi parë një rritje të çmimeve të frutave dhe perimeve. Inflacioni në muajin mars shënoi 2.6 % me rritje të lehtë, por kjo kategori ka pasur një rrije. Ne që prej fillimit të krizës kemi monitoruar çmimet. Janë 80 produkte të shportës që monitorohen me bazë ditore në Tiranë dhe qarqe të tjera. Rritja ka ndodhur vetëm në kategorinë e perimeve, ndërsa kategoritë e tjera të ushqimeve nuk kanë pasur një rrijte.
Ministrja garantoi qytetarët se çmimet po monitorohen rregullisht dhe qeveria do të kujdeset të subvencionojë të gjitha shtresat në nevojë që nuk mund të përballojnë rritjen çmimeve.
