Myrto Uzuni ka thënë lamtumirë Granadës pas tre sezonesh të paharrueshme, duke u larguar si golashënuesi më i mirë i huaj në historinë e klubit. Sulmuesi i Kombëtares shqiptare e ka konfirmuar largimin e tij nëpërmjet një postimi në rrjetet sociale, ku shprehu falenderimet për shokët e skuadrës dhe stafin, por edhe zhgënjimin për disa aspekte të kalimit të tij te Granada.
Në postimin e tij, Uzuni thekson se humbi Europianin 2024 për të dhënë gjithçka për këtë fanellë, duke vuajtur edhe dëmtime të shumta gjatë sezonit të fundit. Ai e përfundon mesazhin duke nënvizuar se shpreson që kjo mos jetë një lamtumirë përfundimtare, dhe se do të vazhdojë të ndjekë suksesin e Granadës!
Postimi i plotë i Myrto Uzunit:
“Të dashur tifozë të Granada CF,
Sot them lamtumirë. Momenti erdhi me lot në sy pas tre vitesh të paharrueshme. Falënderoj shokët e mi të skuadrës, trajnerët dhe punëtorët e klubit. Vajzat e kuzhinës. Njerëz që punojnë shumë dhe nuk dalin në televizion për të ndarë momentet e triumfit dhe humbjes që më shënuan përgjithmonë.
Erdha në vitin 2022, përjetuam një rënie që më bëri më të fortë dhe në 2023 arrita versionin tim më të mirë, duke fituar trofeun e golashënuesit me 23 gola dhe titullin kampion. Në vitin 2024, edhe pse shënova 11 gola, nuk mjaftuan për të shpëtuar ekipin. Kam luajtur i dëmtuar me gjilpëra në çdo ndeshje. Dhe kam humbur Euro 2024 pasi e ndjeja peshën e mbështetjes suaj dhe kam dhënë gjithçka për këtë fanellë.
Sot duhet të marr një vendim të vështirë për familjen time. Largohem me krenari nga ky klub, duke qenë golashënuesi më i mirë i huaj në historinë e tij (49 gola, 8 asistime në 106 ndeshje). Nuk do ta harroj kurrë mbështetjen tuaj, veçanërisht atë të Curva Sur.
Shpresoj që kjo të jetë një “shihemi më vonë” dhe jo një lamtumirë përfundimtare. Deri në momentin kur këta njerëz nuk janë më në klub. Sepse Granada e meriton të jetë gjithmonë në La Liga. Zemra ime do të jetë gjithmonë kuq e bardh.
Të dua, Granada ime. Gjithmonë ushtari yt, Myrto Uzuni.”
Uzuni largohet nga Granada duke lënë pas një trashëgimi të shquar: 49 gola dhe 8 asistime në 106 ndeshje, duke u bërë golashënuesi më i mirë i huaj në historinë e klubit. Tashmë ai është gati për një kapitull të ri në karrierën e tij me Austin FC në SHBA.
