Pas fitores së vështirë në kampionat ndaj Komos, skuadra bardhezi nisi përgatitjet për ndeshjen e “play off”-it të Ligës së Kampionëve kundër PSV-së. Thiago Motta e motivoi kështu skuadrën e tij: “Objektivi ynë është të kualifikohemi në raundin e 1/8-ave të Ligës së Kampionëve. Nuk mendojmë për Interin, PSV-ja është një skuadër e madhe dhe e respektojmë, por duam të japim maksimumin për të fituar”.
Skuadra e tij duket më e qëndrueshme para përballjes me PSV-në: “Vështirësitë na kanë forcuar si grup dhe skuadra është më rezistente. Ndaj PSV-së është një sfidë e rëndësishme, të gjithë e dimë këtë. Është një ndeshje e madhe, ndaj duhet ta luajmë në maksimum. Duhet të luajmë me intensitet dhe ritëm, duke respektuar kundërshtarin. Luajmë në shtëpi dhe duhet të bëjmë lojën tonë.
Si ka ndryshuar PSV-ja?
Është një ekip i ri, që bën presion të madh dhe luan me guxim. Në ndeshjen e parë të grupit patëm momente të mira, por gjithashtu vuajtëm posedimin dhe lëvizjet e tyre nga krahët. Duhet të jemi të përgatitur për çdo situatë.
Ju presin tetë ditë vendimtare…
Tri ndeshje në tetë ditë nuk janë një justifikim. Kemi një skuadër të re dhe mund t’i përballojmë. Nuk mendojmë për Interin, fokusi është vetëm te PSV-ja. Edhe në ndeshjen e fundit treguam që skuadra ka fituar rezistencë psikologjike.
Cila është gjendja e skuadrës dhe e lojtarëve tuaj?
Vlahovic e shoh shumë mirë, si të gjithë të tjerët. Të gjithë duan të luajnë, por nuk mund të luajnë më shumë se 11 futbollistë në formacion. E rëndësishme është cilësia e minutave në fushë, jo sasia. Me Koopmeiners jam shumë i kënaqur, punon shumë dhe është përshtatur në disa role. Kolo Muani është shumë i talentuar, por edhe shokët e skuadrës e kanë ndihmuar që të shfaqë cilësitë e tij. Cambiaso nuk do të jetë i gatshëm për këtë ndeshje.
