Ditën e diel, vendi ynë do të vijojë të ndikohet nga kushte atmosferike të paqëndrueshme. Moti parashikohet me vranësira mesatare deri të dendura, të shoqëruara me kthjellime të herëpashershme.
Reshjet e shiut do të jenë të herëpashershme dhe me intensitet të ulët që nga orët e para të 24-orëshit deri në mëngjes, fillimisht në jug të vendit dhe gradualisht do të shtrihen në pjesën tjetër të territorit. Lokalisht, reshjet mund të shfaqen në formën e shtrëngatave afatshkurtra. Gjatë mesditës dhe pasdites, reshjet do të lokalizohen kryesisht në veri dhe pjesërisht në zonat malore të juglindjes. Në orët e mbrëmjes, reshjet e shiut do të ndërpriten në të gjithë vendin.
Në zonat mbi 900–1000 metra mbi nivelin e detit, në verilindje dhe juglindje, priten reshje bore me intensitet të ulët dhe lokalisht deri mesatar, kryesisht në juglindje.
Era do të fryjë nga verilindja në lindje me shpejtësi mesatare rreth 8 m/s, ndërsa përgjatë vijës bregdetare dhe në zonat luginore shpejtësia e saj mund të arrijë deri në 17 m/s.
Temperaturat maksimale do të arrijnë deri në 14°C, ndërsa minimalet do të zbresin në 1°C në rang territori.
