Gjatë natës, reshje të shumta shiu kanë ndodhur në Qarkun Shkodër, duke shkaktuar probleme kryesisht në zonat malore të bashkive Pukë dhe Fushë Arrëz. Disa rrugë rurale janë bllokuar për shkak të rrëshqitjeve të dherave dhe rënies së gurëve, ndërsa disa fshatra përjetuan ndërprerje të energjisë elektrike. Strukturat vendore dhe ato të emergjencave civile janë angazhuar në terren për pastrimin e rrugëve dhe rikthimin e energjisë në zonat e prekura.
Në bashkinë Shkodër, reshjet ka vazhduar gjatë natës, por deri tani nuk ka asnjë raportim serioz për emergjencat civile, përveç bllokimit të rrugës Kir–Shosh për shkak të rënieve të gurëve. Strukturat përgjegjëse janë njoftuar dhe po punojnë për zhbllokimin e rrugës. Në bashkinë Malësi e Madhe, situata është nën kontroll dhe nuk janë raportuar probleme, megjithatë, strukturat e emergjencave civile janë në gatishmëri për të monitoruar situatën.
Bashkia Vau Dejës gjithashtu nuk ka raportuar probleme të mëdha, por po vijon verifikimin e banesave të përmbytura nga reshjet e kaluara. Përkundrazi, në bashkinë Pukë, disa rrugë rurale janë dëmtuar, veçanërisht në njësitë administrative Rrapë dhe Gjegjan, ku akseset për fshatrat janë bllokuar. Rruga nacionale Pukë–Fushë Arrëz është e bllokuar për shkak të shembjes së një masivi dhe ka pasur ndërprerje të furnizimit me energji elektrike në disa fshatra.
Në Fushë Arrëz, pothuajse të gjitha rrugët rurale kanë pësuar dëmtime nga reshjet e dendura. Ajo ka raportuar rrëshqitje masive dhe bllokime, si dhe probleme me furnizimin me energji elektrike në disa njësitë. Aktualisht, dy fadroma po punojnë për të hapur aksin rrugor Pukë–Fushë Arrëz.
Drejtoria e Ujitjes dhe Kullimit Lezhë ka raportuar rreth 40 mm reshje shiu, pa dëmtime në argjinatura, ndërsa rrjedha e lumenjve është brenda normave. Ndërsa reshjet vazhdojnë, situata është ndërlikuar në disa zona, sidomos në Pukë dhe Fushë Arrëz, por strukturat emergjente janë të gatshme dhe po monitorojnë çdo zhvillim.
