Kryeministri Edi Rama ka reaguar në platformën X pas debateve të fundit mbi mungesën e avionëve zjarrfikës në Shqipëri, duke theksuar se problematika e zjarreve nuk mund të reduktohet vetëm te numri i mjeteve ajrore.
Ai u shpreh se, ndonëse Shqipëria do të kishte përfituar nëse do t’i kishte këto mjete, aktualisht vendi disponon më shumë kapacitete ajrore se çdo vit tjetër, falë flotës vendase dhe ndihmës nga Mekanizmi Europian apo Emiratet e Bashkuara Arabe.
Rama solli shembullin e Greqisë, e cila ka një flotë prej 77 avionësh zjarrfikës, rreth 20 helikopterësh dhe mijëra automjetesh tokësore, por megjithatë po përballet me situata të rënda nga flakët.
Sipas tij, kurimi i pasojave nuk zgjidh shkaqet, të cilat janë komplekse dhe të përbashkëta për shumë vende të prekura këtë sezon.
Edi Rama: Ka shpërthyer një debat pse nuk blen Shqipëria avionë zjarrfikës, ndërkohë që ka ca llogari që duhen bërë dhe zjarret e ditëve të fundit nuk janë assesi çështje e një apo dy apo edhe tre avionësh! Dakord, mirë do ishte t’i kishim, por…
Duke i siguruar të gjithë se kemi këto ditë mjete nga ajri më shumë se çdo vit më parë, falë flotës sonë dhe mbështetjes nga Mekanizmi Europian apo Emiratet e Bashkuara Arabe, i ftoj të gjithë të ngrenë një pyetje: Po fqinjët tanë, Greqia dhe Italia apo Turqia dhe Spanja, që po përcëllohen më keq se ç’do vit tjetër kanë vallë mungesë avionësh?!
Ja një informacion bazuar në referencat e vetë shtypit grek për Greqinë për shembull:
Greqia ka një flotë ajrore totale prej 77 avionësh zjarrfikës; helikopterë janë pakashumë 20; automjete të tjera afërsisht 3,500 dhe zjarrfikëse të të gjitha llojeve e funksioneve.
Pra, e thënë thjeshtë. Sa më shumë aq më mirë padiskutim, por prapëseprapë kurimi i pasojave nuk i eliminon shkaqet, të cilat janë disa, janë njësoj për të gjithë shtetet që po i vuajnë zjarret këtë sezon (disa shumë më keq se ne meqë ra fjala) dhe janë shumë më komplekse se sa duken kur numëron avionët.
