Mbrëmjen e djeshme një situatë totalisht e paprecedentë dhe e papërgjegjshme u regjistrua në repartin e reanimacionit në QSUT, ku shkëputja e energjisë elektrike për gjysmë ore u rrezikoi seriozisht jetën rreth 30 pacientëve që ndodheshin në ato ambiente.
Duhet theksuar se në këto mjedise marrin trajtim pacientë jeta e të cilëve garantohet nga funksionimi i aparaturave elektrike, që mbrëmë u fikën dhe nuk punuan.
Në një reagim për ngjarjen, mjeku Erion Dasho që punon në Gjermani, tha: “Jetën nga vdekja në disa raste e ndajnë disa sekonda. Ndaj këto pjesë të spitalit duhet të kenë mbështetje. Është e papranueshme që në një qendër speciale, të kemi ndërprerje me minuta apo orë të energjisë elektrike. Kjo dëmton cilësinë e kujdesit, sigurinë e pacientit, pasi vihet në rrezik jeta e tyre. Pa energji vihet në pikëpyetje siguria e pacientit me aspirim apo me probleme kardiake…”
Sipas burimeve nga brenda spitalit, ndërprerja e energjisë ka qenë e plotë dhe gjeneratori rezervë nuk ka funksionuar, duke e lënë për minuta të tëra urgjencën dhe shërbimet jetike në kushte kritike. Pacientë, familjarë dhe staf mjekësor kanë përjetuar momente ankthi, ndërsa aparaturat që mbajnë në jetë pacientët janë vënë në rrezik.
Në një reagim publik, QSUT tha se falë aktivizimit të menjëhershëm të sistemeve rezervë, UPS-ve dhe gjeneratorëve, aparaturat mjekësore jetike kanë vijuar të funksionojnë normalisht, pa u cenuar në asnjë moment jeta e pacientëve.
Referuar pamjeve filmike, gjeneratorët nuk u aktivizuan menjëherë dhe jeta e pacientëve u rrezikua. Fakt mbetet se energjia ka munguar, duke e kategorizuar deklaratën zyrtare të QSUT thjesht propagandë kur thotë se situata u vu nën kontroll menjëherë si pasojë e aktivizimit të gjeneratorëve.
Përgjegjësia bie drejtpërdrejt mbi drejtoreshën e QSUT Anxhela Paparizo dhe ministren e Shëndetësisë Evis Sala.
