Milani është rikthyer seriozisht në pistën Igli Tare, duke e konsideruar atë kandidatin kryesor për të marrë drejtimin sportiv të klubit. Pas disa kontakteve gjatë javëve të fundit, palët janë afruar ndjeshëm dhe pritet një takim vendimtar në fillim të javës që vjen, që mund të finalizojë marrëveshjen.
Tare ka bindur drejtuesit kuqezinj, veçanërisht CEO-n Xhorxho Furlani, me idetë e tij për ndërtimin e një projekti të ri teknik, të mbështetur mbi balancën financiare dhe një merkato të zgjuar. Diskutimet kanë qenë produktive dhe duket se Milani është gati t’i japë dritën jeshile.
Pavarësisht se ende nuk ka një vendim zyrtar, sinjalet janë pozitive dhe gjithçka po shkon drejt një marrëveshjeje. Vetë Furlani është shprehur së fundmi se po kërkohet njeriu i duhur për të çuar Milanin drejt fitoreve – dhe Tare duket gjithnjë e më pranë këtij profili.
