Milani është në mes të një dileme të rëndësishme për sezonin e ardhshëm, lidhur me të ardhmen e portierit Mike Maignan. Edhe pse francezi ka një kontratë që zgjat deri në qershor 2026, rinovimi i tij ka ngecur dhe ka një distancë të madhe mes drejtuesve të klubit dhe agjentit të tij. Kjo situatë ka bërë që drejtuesit e Milanit të fillojnë të shqyrtojnë alternativa për ta zëvendësuar portierin aktual.
Një nga emrat që ka dalë në sipërfaqe është ai i Alisson Becker, portierit të Liverpool. Alisson ka një kontratë që e lidh me “The Reds” deri në vitin 2027, dhe klubi mund ta shesë gjatë verës, sidomos nëse nuk ka plane për rinovim. Sipas raportimeve të Sky Sport Suisse, Milani ka filluar kontaktet e para me përfaqësuesit e Alisson, por marrëveshja konsiderohet e komplikuar.
Disa pengesa janë evidentuar në këtë proces. Së pari, çmimi i kartonit të Alissonit, i cili ka mbushur 33 vjeç, mund të jetë i arsyeshëm, por Liverpool nuk është i gatshëm ta shesë atë për një shumë të vogël. Së dyti, pagat e larta janë gjithashtu një shqetësim; Alisson aktualisht fiton mbi 8 milionë euro në vit, një shumë e konsiderueshme për buxhetin e Milanit.
Përveç Alisson, Milani po shqyrton edhe një portier tjetër brazilian, Hugo Souza, 25 vjeç, i Corinthians. Çmimi i Souza-s është rreth 12 milionë euro, një shumë shumë më e arritshme për Milanin në krahasim me Alissonin.
Me situatën e Maignan që mbetet e paqartë dhe merkaton që po afron, Milani pritet të ketë një verë dinamikash të mëdha në kërkim të portierit të ri. Kjo periudhë do të jetë vendimtare për klubin kuqezi, që synon të ndërtojë një skuadër konkurruese për sezonin e ardhshëm.
