Milan është mundur 1-2 në “San Siro” ndaj Lazio-s, ndeshje e vlefshme për javën e 27-të të Serisë A. Ishin bardhekaltrit ata që kaluan të parët në avantazh, pas një kundërsulmi të shpejtë, goditja e Marusic ndalet nga Maignan, por topi i kthyer mbrapsht nga pritja e francezit dërgohet në rrjetë nga Zaccagni, i cili gjendej në kohën dhe në vendin e duhur.
Pjesa e parë mbyllet 0-1 për lazialët. Në minutën e 66-të, Milan mbetet me 10 lojtarë. Pavlovic ndëshkohet direkt me karton të kuq pas ndërhyrjes nga mbrapa ndaj Isaksen.
Goli i barazimit për Milan-in do të vinte në minutën e 84′, Chukwueze shënon me kokë pas asistit të Leao-s. Goli i fitores për bardhekaltrit do të vinte nga pika e bardhë e penalltisë nga Pedro në minutat e fundit shtesë. Isaksen pengohet nga Maignan dhe pas ndërhyrjes së VAR, u akordua penallti për Lazio-n.
Pas kësaj fitoreje, Lazio renditet në vendin e katërt me 50 pikë. Milan renditet në vend të nëntë me 41 pikë.
