Lionel Messi do të rikthehet në Afrikë për një ndeshje miqësore luksoze, që ka tërhequr vëmendjen e madhe globale. Kapiteni i Argjentinës do të udhëheqë skuadrën kampione të botës në një përballje me Angolën më 14 nëntor, në kryeqytetin Luanda. Federata Argjentinase e Futbollit (AFA) ka njoftuar se “La Albiceleste” do të zhvillojë disa ditë stërvitje në Spanjë para se të nisen për në Afrikë për këtë ndeshje të vetme të muajit nëntor. Pas duelit, ekipi do të kthehet në Europë për të vijuar grumbullimin deri më 18 nëntor.
Sidoqoftë, ngjarja nuk po tërheq vëmendjen kryesore për shkak të asaj që ndodh në fushë, por për shpenzimet marramendëse që do të bëjë Angolai. Raportet nga “African Football Insider” sugjerojnë se vendi afrikan do të shpenzojë plot 10 milionë dollarë për të sjellë Messin dhe skuadrën argjentinase në Luanda. Kjo ndeshje është pjesë e një projekti ambicioz të qeverisë dhe Federatës së Futbollit të Angolës, që synon të promovojë turizmin dhe të vendosë futbollin vendas në hartën globale.
Reagimet në rrjetet sociale janë të përziera. Disa qytetarë e shohin këtë ngjarje si historike dhe një mundësi unike për të parë nga afër yllin e futbollit, ndërsa të tjerë e kritikojnë si një shpenzim të tepruar, veçanërisht në një vend që ballafaqohet me shumë sfida ekonomike. Kjo ndeshje, përveç vlerës sportiv do të ketë ndikim edhe në sferën ekonomike të Angolës, duke mundësuar një rritje të mundshme të turizmit dhe njohjen më të madhe të futbollit lokal në arenën ndërkombëtare.
Në këtë kontekst, miqësorja do të shërbejë si një test për potencialin e Angolës si një destinacion sportiv dhe turistik, duke u shfrytëzuar si mundësi për investime të ardhshme në ndihmë të zhvillimit të sportit dhe infrastrukturës.
