Policia e Dibrës ka vënë në pranga dy persona dhe ka sekuestruar një armë zjarri kallashnikov, municion luftarak dhe drogë.
Në kuadër të operacionit policor të koduar “Mesnata”, shërbimet e Policisë, në fshatin Sllovë, kanë ndaluar automjetin tip “Peugeot”, që drejtohej nga shtetasi E. K. (D), 26 vjeç, banues në fshatin Blliçë, dhe pasagjerin, shtetasin A. T., 22 vjeç, banues në fshatin Fushë-Alie.
Gjatë kontrollit fizik, 26-vjeçarit iu gjet e fshehur në trup një sasi lënde narkotike kanabis, e ndarë në doza, gati për shitje.
Po në vijim të operacionit, shërbimet e Policisë ushtruan kontroll në banesat e këtyre dy shtetasve, ku, në banesën e shtetasit A. T., u gjet dhe u sekuestrua në cilësinë e provës materiale një armë zjarri kallashnikov dhe 25 copë fishekë, të cilët i mbante pa leje.
Shtetasi E. K. (D), akuzohet për veprën penale “Prodhimi dhe shitja e lëndëve narkotike”, ndërsa A. T., për veprën penale “Mbajtja pa leje e armëve luftarake”.
