Pak orë para mbylljes zyrtare të fushatës elektorale, kreu i Partisë Socialiste, Edi Rama ka ndarë një mesazh për qytetarët shqiptarë dhe veçanërisht për ata që jetojnë jashtë kufijve dhe ende nuk e kanë kthyer zarfin me votën e tyre.
Kreu i qeverisë, i kërkon emigrantëve të cilët janë regjistruar, që të kthejnë zarfin në kohë. Duke i konsideruar zgjedhjet e 11 majit historike, Rama tha se Shqipëria tanimë ka një shans real që të mbyllë negociatat me BE në vitin 2027 dhe të jetë anëtare me të drejta të plota në vitin 2030.
Edi Rama: Është dita e fundit e ballafaqimit mes të gjithë palëve para gjykimit të popullit sovran, gjykimit të të gjithëve ju me votën tuaj të dielën më 11 maj. Ky është mesazhi i fundit që dua t’i përcjell të gjithë motrave dhe vëllezërve tanë në Greqi, Itali, Gjermani e me radhë ku ende ka zarfe që janë nëpër shtëpi dhe ku ende ka kohë për tu bërë pjesë e takimit historik të 11 majit, për të takuar historinë së bashku me shumicën dërrmuese të shqiptarëve që më 11 maj do të përcaktojnë rrugën e fatit evropian të Shqipërisë.
Ju lutem, keni marrë mundimin të regjistroheni, për herë të parë mund të votoni nga jashtë kufijve dhe keni shansin historik të merrni pjesë në një palë zgjedhje që janë më shumë se sa zgjedhje për partitë, janë zgjedhje për të përcaktuar se ku do të jetë Shqipëria 2030, për të përcaktuar se si Shqipëria do të ëprballojë dhe do të mbyllë negociatat në 2027. Janë zgjedhje për t’i dhënë një frymë të fortë bashkimi evropian vetë Shqipërisë.
