Merkato e Premier League është futur në javët vendimtare dhe tensioni është në kulm.
Nga përplasjet e bujshme mes yjeve dhe klubeve, te përpjekjet e minutës së fundit për transferime të mëdha, çdo ditë sjell një “telenovelë” të re.
Isak në konflikt të hapur me Newcastle
Alexander Isak ka tronditur Newcastle me një deklaratë të fortë publike ku theksoi se “besimi është humbur” mes tij dhe klubit. Sulmuesi suedez, i përfshirë në ekipin ideal të sezonit të kaluar, ka kërkuar largimin, me Liverpool që po e ndjek nga afër. Newcastle, megjithatë, insiston se nuk ka premtuar shitjen e tij dhe i ka lënë një derë të hapur rikthimit.
Camavinga në shënjestrën e Manchester United
Në “Old Trafford”, Ruben Amorim kërkon forca të reja për mesfushën dhe ka vënë në shënjestër një emër surprizë: Eduardo Camavinga. Real Madrid nuk do ta lëshojë lehtë, por United po përgatit një ofertë rreth 69 milionë £ për 22-vjeçarin, duke e bërë këtë një nga pistat më intriguese të merkatos angleze.
Tottenham shtyn për Eze, por Palace reziston
Crystal Palace nuk ka ndërmend të dorëzohet lehtë për Eberechi Eze. Tottenham ka ofruar rreth 60 milionë £, por palët ende nuk bien dakord për kushtet e pagesës. Kjo mund të bëjë që Eze të luajë në ndeshjen europiane të Palace këtë javë, edhe pse valixhet i ka gati.
Sancho refuzon Romën, kërkon tjetër destinacion
Saga e Jadon Sanchos vazhdon. Manchester United pranoi një ofertë 20 milionë £ nga Roma, por lojtari refuzoi marrëveshjen. Besiktas është gjithashtu i interesuar, por anglezi pret një opsion më tërheqës para se dritarja të mbyllet.
Chelsea në kërkim të mbrojtësit pas dëmtimit të Colwill
Trajneri Enzo Maresca kërkon me ngulm një qendërmbrojtës të ri, pas dëmtimit të rëndë të Levi Colwill. Drejtuesit e Chelseat mbeten skeptikë, duke preferuar alternativat brenda ekipit, ndërsa Tosin Adarabioyo pritet të rikthehet së shpejti.
Garnacho refuzon Bayernin, vetëm Chelsea në mendje
Një tjetër “telenovelë” është ajo e Alejandro Garnachos. Bayern provoi ta rrëmbejë, por ai e refuzoi menjëherë. Argjentinasi dëshiron vetëm Chelsean, ndonëse United kërkon 50 milionë £ dhe bisedimet po ngelen pezull për çmimin.
Rodrygo, në pritje të City
Në Spanjë, situata e Rodrygos po ndiqet me interes nga Manchester City. Sulmuesi brazilian nuk është aktivizuar nga Xabi Alonso në dy ndeshjet e para dhe kjo ka ngritur dyshime mbi të ardhmen e tij. Megjithatë, çdo lëvizje e City-t do të varet nga transferimi i Savinhos te Tottenham, që ende është i bllokuar.
Merkatoja e Premier League po ofron çdo ditë skenarë të rinj dhe deri më 1 shtator pritet të ketë ende shumë lëvizje që do të ndryshojnë ekuilibrat e kampionatit më të ndjekur në botë.
