Kryeministri Edi Rama, kishte të ftuar një ditë më parë në podcastin e tij “Flasim”, mjeken estetiste, Vilma Tafilaj, me të cilën ndau një bashkëbisedim për operacionet plastike, dhe ndërhyrjet estetike.
Tafilaj, e cila zotëron një klinikë private estetike, ndau përballë Ramës disa këshilla se si mund të përmirësojmë pamjen tonë fizike, përmes ndërhyrjeve apo operacioneve plastike.
Po çfarë fshihet pas imazhit të saj prej profesionisteje?
Pas daljes publike në podcastin e Ramës, gazetarja Ujeza Dolshani ka bërë një denoncim publik për mjeken estetiste, Vilma Tafilaj.
Përmes një postimi në rrjete sociale, ajo ka ndarë disa pamje të saj, përmes së cilave pretendon se shërbimet në klinikën “Repeat Medical Clinic” të mjekes i kanë shkaktuar djegie në fytyrë.
Pas dëmtimit, gazetarja thotë se nuk pati as ndjesë, as transparencë, as përgjegjësi profesionale nga ana e mjekes Vilma Tafilaj.
Pas gjithë këtyre akuzave, doktoresha në fjalë vazhdon normalisht aktivitetin e saj, punon në QSUT, ushtron në klinikë private dhe promovohet në hapësira publike si “specialiste e suksesshme”. Pa asnjë sqarim, përgjegjësi apo reflektim.
Kjo situatë ngre disa pyetje: Kush mban përgjegjësi kur një trajtim “estetik” shkatërron fytyrën e një pacienteje? A kontrollohen dhe a mbajnë përgjegjësi këto klinika private për këto situata aspak të këndshme.
Ky rast duhet të shërbejë si mesazh për më shumë kujdes gjatë ndërhyrjeve estetike.
