Një mësues nga Elbasani është marrë në hetim nga Prokuroria e Elbasanit, pasi dyshohet se ka kërcënuar një person duke pretenduar se i ka cënuar reputacionin e punës.
E. K., 34-vjeç mësues në fshatin Jogodinë, sipas policisë ka kanosur shtetasin I. K. Mësuesi pretendon se ky i fundit i ka dëmtuar imazhin si mësues. Teksa I. K., është marrë në pyetje për të bërë deklarimet për rastin, ka thënë se mësuesi përveç se e ka kanosur me fjalë, ka marrë nga makina e tij një bidon me benzinë dhe e ka hedhur në drejtim të tij.
Hetimet ndaj mësuesit po zhvillohen për dy vepra penale, ‘Kanosja’ dhe ‘Vetëgjyqësia’.
Njoftimi i Policisë:
“Për kanosjen e shtetasit I. K., ju bëjmë me dije se nga hetimet e mëtejshme të kryera nga specialistët për Hetimin e Krimeve të Komisariatit të Policisë Elbasan, me qëllim zbardhjen e rrethanave të këtij rasti, rezultoi se autori i dyshuar, shtetasi E. K., 34 vjeç, me profesion mësues, e ka kanosur shtetasin I. K., sepse pretendon se ky i fundit i ka dëmtuar imazhin si mësues. Më tej, në deklarimin e tij, shtetasi I. K. pretendon se përveç kanosjes me fjalë, 34-vjeçari ka hedhur në drejtim të tij, një bidon dyshohet me lëndë djegëse (benzinë) që e ka marrë në automjet. Hetimet për këtë ngjarje po kryhen nga Prokuroria e Elbasanit, ndërsa për 34-vjeçarin rëndojnë akuzat për veprat penale “Kanosja” dhe “Vetëgjyqësia”.
