Arsenal duket se është dorëzuar përfundimisht në garën për titull në Premier League. “Topçinjtë” janë të fokusuar në Champions League, ku të mërkurën e ardhshme do të përballen me Realin në ndeshjen e kthimit në “Bernabeu”.
Arsenal ka barazuar sot 1-1 në “Emirates” ndaj Brentford, ndeshje e vlefshme për javën e 32-të në Premier League. Vendasit gjetën golin me Kieran Tierney në minutën e 26-të, i cili shënoi me kokë, por u anullua nga VAR për pozicion jashtë loje. Pjesa e parë u mbyll 0-0.
“Topçinjtë” gjetën golin me Thomas Partey në minutën e 60-të, pas asistit të Declan Rice, ndërsa miqtë barazuan shifrat me Yoane Wissa në minutën e 73-të, i cili shënoi një gol të bukur me gjysëm kthesë.
Pas këtij barazimi, Arsenal renditet i dyti me 63 pikë, 10 pikë më pak se Liverpool. Klubi i kuq ka mundësi nesër të shkojë në 13 pikë nëse fiton në shtëpi ndaj West Ham.
