Policia e Shkodrës ka arrestuar një 19-vjeçar të shpallur në kërkim për mbajtje të paligjshme të armëve të zjarrit.Sipas njoftimit të policies, i arrestuari është shtetasi Agostin Gjeloshi. Më 30 maj 2025, në zbatim të vendimit të Gjykatës së Posaçme kundër Korrupsionit dhe Krimit të Organizuar, u ushtrua kontroll në një automjet në fshatin Kir.
Gjatë kontrollit u gjetën dhe u sekuestruan dy armë zjarri të tipit kallashnikov, që dyshohet se përdoreshin nga i riu.
Armët janë sekuestruar në cilësinë e provës materiale, ndërsa ndaj 19-vjeçarit vijojnë procedurat ligjore.
Njoftimi i Policisë:
“Si rezultat i kontrolleve të vazhdueshme për lokalizimin dhe kapjen e shtetasve në kërkim, bazuar dhe në informacionet e siguruara nga inteligjenca policore, specialistët për Hetimin e Krimeve të Komisariatit të Policisë Shkodër kanë lokalizuar, kapur dhe ndaluar shtetasin:A. Gj., 19 vjeç, banues në fshatin Kir.
Ky shtetas ishte shpallur në kërkim, pasi më datë 30.05.2025, në zbatim të vendimit të Gjykatës së Posaçme kundër Korrupsionit dhe Krimit të Organizuar, shërbimet e Policisë kanë ushtruar kontroll në një automjet, në një lagje të fshatit Kir, ku kanë gjetur dhe sekuestruar 2 armë zjarri kallashnikov të cilat dyshohet se i posedonte shtetasi A. Gj.”
