Komisioni Qendror i Zgjedhjeve (KQZ) ka bërë të ditur se periudha për regjistrimin e votuesve me nevoja të veçanta do të fillojë më 29 tetor dhe do të zgjasë deri më 4 nëntor, në prag të balotazhit të planifikuar për 9 nëntor. KQZ-ja do të sigurojë ekipe mobile për të lehtësuar votimin e këtyre individëve në ditën e balotazhit.
Registrimi do të bëhet përmes platformës elektronike vpnv.kqz-ks.org, duke lejuar votuesit të regjistrohen në mënyrë të thjeshtë. Votuesit me nevoja të veçanta përfshijnë disa kategori:
-
Votues me nevoja të veçanta – Këta votues janë ata që, për shkak të paaftësisë fizike ose shëndetësore, nuk janë në gjendje të dalin nga shtëpia për të votuar personalisht. Ata mund të regjistrohen online ose në Komisionin Komunal të Zgjedhjeve, ndërsa ata që ishin regjistruar në raundin e parë nuk kanë nevojë për regjistrim të ri.
-
Votues me lëvizje të kufizuar në institucione – Ky segment përfshin individë që kanë lëvizje të kufizuar për shkak të qëndrimit në institucione, si spitalet, shtëpitë e të moshuarve, institucionet e shëndetit mendor dhe burgjet. KQZ-ja do të bëjë përditësimin e listave për votuesit e kësaj kategorie që ishin regjistruar më parë.
-
Votues në rrethana të veçanta – Këtu përfshihen ata që, për arsye sigurie ose që janë nën arrest shtëpiak, nuk mund të votojnë në vendvotimin e tyre. Regjistrimi do të mundësohet përmes platformës elektronike dhe me asistencën e Komisionit Komunal të Zgjedhjeve.
Kjo iniciativë e KQZ-së synon të sigurojë që të gjithë individët me nevoja të veçanta të kenë mundësinë të ushtrojnë të drejtat e tyre të votës, duke garantuar një proces të drejtë dhe të aksesueshëm për të gjithë qytetarët.
