Aeroporti Heathrow do të qëndrojë i mbyllur deri në mesnatë, pas një zjarri masiv që shpërtheu në një nënstacion të energjisë elektrike. Sipas asaj që mediat vendase raportojnë si pasojë e zjarrit do të anulohen të paktën 1,300 fluturime.
Një zëdhënës i Heathrow deklaroi: “ne nuk jemi ende të qartë dhe nuk kemi më tepër informacione se kur mund të rikthehet energjia”.
Ndër të tjera ai bëri me dije se edhe përgjatë ditëve në vijim pritet që të kenë mungesë energjie.
“Heathrow po përjeton një ndërprerje të konsiderueshme të energjisë. Për të garantuar sigurinë e pasagjerëve dhe kolegëve tanë, Heathrow do të qëndrojë i mbyllur deri në orën 23:59 të 21 marsit”, thuhet në një deklaratë në faqen e internetit të aeroportit të Londrës.
Në vendngjarje ndodhen rreth 70 zjarrfikës dhe 10 makina zjarrfikëse, të cilët janë angazhuar në zonën e Hayes, në perëndim të Londrës. Brigada e Zjarrfikësve të Londrës konfirmoi se mbi 150 persona janë evakuuar për shkak të incidentit.
Heathrow u klasifikua përgjatë vitit që lamë pas si aeroporti më i ngarkuar në botë për fluturime ndërkombëtare, pas atij të Dubait.
