Ardian Ismajli mund të transferohet te Interi. Klubi zikaltër, raportohet se ka shfaqur interes serioz për mbrojtësin e Kombëtares shqiptare. Në sfidën e ardhshme, mes Interit dhe Empolit, 28-vjeçari do të vëzhgohet nga skautët e kampionëve, për të marrë një vendim final për një transferim të mundshëm.
Ismajli është kthyer në një nga objektivat Interit për repartin e mbrojtjes. Futbollisti i Shqipërisë, i plotëson kërkesat e zikaltërve, si një mbrojtës i qetë, i sigurt dhe i aftë për t’u përshtatur në sisteme të ndryshme taktike. Aftësia e tij për të mbuluar disa pozicione në mbrojtje dhe për të ofruar stabilitet në fazën defensive e bën atë një kandidat ideal për t’u integruar në skuadrën e Simone Inzaghit.
Një tjetër faktor që i jep përparësi këtij transferimi është fakti se kontrata e Ismajlit me Empolin përfundon në qershor të vitit 2025, duke e bërë atë të disponueshëm për një transferim me parametra zero. Për një klub si Interi, që shpesh ka përdorur strategji të tilla në merkato për të minimizuar shpenzimet, kjo është një mundësi ideale.
Gjithçka pritet të varet nga performanca e tij në ndeshjen ndaj Interit, një sfidë që do të jetë në qendër të vëmendjes së skautëve dhe trajnerit Simone Inzaghi. Një paraqitje bindëse në këtë përballje mund të jetë çelësi për konkretizimin e transferimit. Megjithatë, Interi nuk është i vetmi që ka hedhur sytë drejt mbrojtësit shqiptar.
Juventus, Napoli dhe Lazio, janë gjithashtu në ndjekje të tij. Këto ekipe kërkojnë të përfitojnë nga situata kontraktuale e lojtarit dhe të sigurojnë shërbimet e tij pa paguar një shumë transferimi.
Me një vlerë tregu që arrin rreth 6 milionë euro, Ismajli konsiderohet një nga lojtarët më të vlefshëm te Empoli dhe një shtyllë e rëndësishme për skuadrën toskane. Përveç aftësive të tij mbrojtëse, ai është i njohur për përqendrimin dhe aftësinë për të lexuar lojën, cilësi që e kanë bërë një figurë kyçe në skuadrën e Empolit.
