Alvaro Carreras, mbrojtësi i ri i majtë që luan te Benfica ka tërhequr vëmendjen e shumë klubeve të mëdha përfshi këtu Barcelonën dhe Real Madrid-in. Megjithatë, siç raportohet nga gazeta AS, 21-vjeçari i ka premtuar besnikëri Benfica-s dhe nuk e ka ndër mend të rikthehet në Spanjë apo të shkojë diku tjetër tani për tani.
“Jam i lumtur te Benfica. Ky klub më dha mundësinë të rritem dhe i detyrohem për gjithçka”, deklaroi Carreras pas ndeshjes ndaj Barcelonës, ku bëri një super paraqitje.
Alvaro Carreras është produkt i dalë nga akademia e Deportivo La Coruna, më pas ka luajtur dhe për të rinjtë e Real-it dhe Manchester United. Të “Djajtë e Kuq” nuk arriti dot të fitonte një vend në ekipin e parë dhe nuk luajti asnjë ndeshje zyrtare, më pas erdhën disa huazime dhe në fund ishte Benfica që pagoi 7 milionë euro për kartonin e tij.
Spanjolli ka nënshkruar me Benfica-n deri në vitin 2029 dhe klauzola për largimin e tij është 50 milionë euro. Refuzimi ndaj Real Madrid-it dhe Barcelonës tregon pjekurinë dhe ambicien e tij. Carreras dëshiron të vazhdojë të rritet si futbollist dhe të bëhet një pjesë kyçe e Benfica-s dhe pasi të ketë fituar përvojën e nevojshme do vijë momenti për t’u transferuar te një klub i madh.
