Policia e Korçës ka arrestuar 4 veterinerë që matrikulluan 120 bagëti të imëta dhe gjedhë, të kontrabanduara dhe ka shpallur në kërkim një 39-vjeçar që dyshohet se ka kontrabanduar bagëtitë dhe gjedhët, nga Greqia.
Gjithashtu u proceduan në gjendje të lirë 3 shtetas që mbajtën në stallat e tyre bagëtitë dhe gjedhët.
Në pranga ranë Baki Myrtollari, Kujtim Agolli, Demir Koritari dhe Ergys Lame.
Në kërkim u shpall shtetasi G. M., 39 vjeç, banues në Devoll, i dyshuar për veprat penale “Kondrabanda me mallra të tjera”, “Ruajtja dhe depozitimi i mallrave kondrabandë”, “Tregtimi apo transportimi i mallrave kondrabandë”, “Fshehja e të ardhurave” dhe “Mospagimi i taksave dhe tatimeve.
Nga hetimet dyshohet se shtetasi i shpallur në kërkim G. M., ka kontrabanduar nga Greqia, 100 bagëti të imta dhe 20 gjedhë. Më pas, dyshohet se në bashkëpunim me shtetasit e arrestuar (veterinerët) i kanë matrikulluar bagëtitë dhe gjedhët, me matrikullat që kanë marrë nga zyra e veterinarisë në Devoll. 3 shtetasit e proceduar dyshohet se kanë mbajtur në stallat e tyre, bagëtitë dhe gjedhët e kontrabanduara nga 39-vjeçari.
Hetimet
Burime të siguruara pranë grupit të hetimit bëjnë me dije se prej 6 muajsh personat e arrestuar por dhe të tjerë kanë qenë në hetim, lidhur me kontrabandimin e bagëtive, të cilat kontrabandoheshin nëpërmjet kufirit të gjelbër nga Greqia në Shqipëri, në drejtim të Devollit e më pas matrikulloheshin e hidheshin në treg.
Gjatë kësaj periudhe persona të dyshuar dhe të tjerë pasi kanë matriukulluar, i kanë therrur bagëtitë dhe i kanë tregtuar për konsum.
Hetimet po vijojnë edhe për institucionet e tjera përgjegjëse.
