Marco Materazzi ka fituar gjithçka që mund të fitohej si lojtar, si me Interin ashtu edhe me Italinë, përveç Kampionatit Europian.
Në një intervistë për ‘Rio Ferdinand Present’, ai ka kujtuar momentet më të rëndësishme të karrierës së tij, duke folur edhe për marrëdhënien me José Mourinhon.
“Ai krijoi një empati të madhe në dhomën e zhveshjes, gjë që është më e rëndësishme sesa teknika apo taktika. Kur u eliminuam nga Manchester United në 1/8 e Champions-it, vendosi të qëndronte tek Interi për të ndërtuar një ekip të madh. Në verë morëm pesë lojtarë: Sneijder, Lucio, Milito, Thiago Motta dhe më pas Pandev në janar. Pasi vendosi të qëndronte, më telefonoi ndërsa isha në supermarket me gruan time dhe më tha se do të donte të më kishte në ekip. Pas dy minutash e thirra dhe i thashë: ‘Dua të qëndroj me ty’, sepse ai ishte një person i sinqertë, nuk gënjente kurrë.”
Si ishte Mourinho në përditshmëri?
“Ishte shumë inteligjent. Nëse shihte që ishe i mërzitur sepse nuk po luaje, të dërgonte një mesazh. Kisha përpara mbrojtës të mëdhenj, por në fund luajta të gjitha ndeshjet e Kupës së Italisë dhe ndeshjen e fundit të kampionatit kundër Sienës. Më pas, në finalen e Champions-it, luajta vetëm disa sekonda, dhe e dija këtë që 20 ditë më parë. Mourinho më kishte shkruar që do të hyja në fushë kur të ishim 2-0. Ishte hera e parë në karrierën time që e dija paraprakisht sa do të luaja në një ndeshje.”
Finalja e Kupës së Botës 2006
“Njerëzit më njohin për goditjen me kokë të Zidane, por unë dua të më kujtojnë për dy golat e mi në finale. Pas ndeshjes, Gigi Riva më tha se do të shkëmbente të gjithë golat e tij me dy golat e mi në atë finale. I thashë se isha i lumtur që ai ishte i lumtur për mua, sepse ishte një legjendë.”
Lojtari më i fortë me të cilin ka luajtur
“Për mua, R9 (Ronaldo Fenomeni) është lojtari më i mirë me të cilin kam luajtur. Ishte një kombinim mes Cristiano Ronaldos dhe Messit. Nëse një mbrojtës i thoshte ‘Do të të vras’, ai humbiste 100%. Kur u largua nga Interi, i thashë: ‘Mos harro që jemi miq nëse luajmë kundër njëri-tjetrit’.”
Marrëdhënia me Ibrahimovicin
“Është lojtar i mirë për të fituar një kampionat, por jo për Champions-in, ka dështuar në këtë kompeticion. Kaká, Shevchenko, Iniesta, Ronaldo, Messi janë lojtarë që bëjnë diferencën në ndeshje të vetme. Zlatan ka një ego të madhe, për të gjithë të tjerët nuk ekzistojnë. Goditja që më çoi në spital në derbi? Në atë ndeshje ai foli me Stankovic-in, por për mua nuk ishte problem. Një herë doli ai, një herë dola unë. Por pasi përfundonte ndeshja, për mua gjithçka ishte e mbyllur.”
Takimi i parë me Mourinhon
“Në fillim ishim të frikësuar, askush nuk fliste, derisa ai tha: ‘Nuk jemi në kishë’. Mund të qeshni, të flisni. Nuk ishte një përbindësh, por një mik. Në dhomat e zhveshjes ishte një njeri krejt ndryshe, bënte shaka dhe qeshte, ishte një person normal. Nuk mund të kishe probleme me të, ishte gjithmonë autentik. Unë nuk kisha nevojë të luaja çdo ndeshje në moshën 37-vjeçare, por stërvitesha fort për të ndihmuar shokët e ekipit. Dhe më pas, nëse nuk luaje me Mourinhon, të paktën të nesërmen ishe i lumtur, sepse nuk bëje stërvitje të rënda!”
Si e bindi Mourinho Eto’o-në të bënte mbrojtësin?
“Në verë, Zlatani tha se donte të largohej dhe se nuk do të fitonim dot pa të. Ndërsa ishim në Pasadena, në dhomat e zhveshjes gjigante të një stadiumi të NFL-së, Mourinho u ngrit dhe i tha të gjithë ekipit: ‘Pa ty do t’i fitojmë të gjitha, mbaje mend këtë’. Unë i shkrova Eto’o-së dhe i thashë se me të do të fitonim gjithçka. Samuel ishte shumë i përulur, ndaj nuk i interesonte ku luante, ai donte thjesht të fitonte.”
