Gjykata e Posaçme për Krimin dhe Korrupsionin ka rrëzuar kërkesën e Arben Meskutit për ndryshimin e masës së sigurisë “arrest në burg”.
Meskuti akuzohet për mashtrimin përmes mikrokredive të mijëra qytetarëve debitorë. Meskuti është pronar i disa shoqërive financiare që ngritën skemë piramidale, ndërsa kishte kërkuar ndryshim të masës së sigurisë arrest me burg, por kjo është rrëzuar nga gjykata.
Procedimi penal për mashtrimin e mikrokredive ka nisur në 25 shkurt të vitit 2020. Gjatë hetimeve të kryera nga Prokuroria ka rezultuar se 5 shoqëritë, Micro Credit Albania, ADCA, SHP Zig, FS, FLASH, morën nga një bankë e nivelit të dytë, 3999 kredi të konsideruara të këqija dhe të pashlyera ndër vite me një shumë totale prej rreth 7.3 milionë euro. Kompanitë kishin në total 32,542 klientë, nga të cilët 90% e tyre ishin në sekuestro preventive.
Njoftimi i GjKKO
Kërkuesi Arben Meskuti me datë 14.01.2025 ka paraqitur pranë Gjykatës kërkesën me objekt: “1. Kërkojmë të administrohet informacioni i Prokurorisë lidhur me hetimet e kryera dhe nevojat e sigurimit; 2. Ndryshimin e masës së sigurimit nga “arrest në burg” parashikuar nga neni 238 i Kodit të Proçedurës Penale, në një masë tjetër sigurimi.”.
Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtari Erjon Bani, bazuar në nenet 112 dhe 246 të K.Pr.Penale, me vendimin Nr. 62, datë 05.02.2025, vendosi:
Vazhdimin e masës së sigurimit “arrest në burg” parashikuar nga neni 238 i K.Pr.Penale, caktuar ndaj personit nën hetim Arben Meskuti me vendimet Nr.1313, datë 21.05.2024 dhe Nr.1368, datë 24.05.2024, të Gjykatës së Shkallës së Parë të Juridiksionit të përgjithshëm Tiranë.
Shpenzimet gjyqësore siç janë bërë.
Kundër këtij vendimi mund të bëhet ankim në Gjykatën e Posaçme të Apelit për Korrupsionin dhe Krimin e Organizuar brenda 5 (pesë) ditëve, duke filluar ky afat nga e nesërmja e njoftimit të këtij vendimi.
Tiranë, më datë 05.02.2025
Gjykata e Posaçme e Shkallës së Parë për Korrupsionin dhe Krimin e Organizuar
