Qeveria e Talibanëve në Afganistan ka vendosur një ndalim të ri që ndalon përdorimin e librave të shkruar nga gra në sistemin universitar. Ky vendim gjithashtu përfshin ndalimin e mësimdhënies për disa lëndë, që lidhen me të drejtat e njeriut dhe ngacmimin seksual. Sipas autoriteteve talibane, janë identifikuar rreth 680 libra që bien ndesh me “parimet e Sheriatit” dhe politikat e tyre, ku 140 tituj janë veçanërisht të autorëve gra, duke përfshirë libra shkencore si “Siguria në Laboratorin Kimik”.
Ky akt përfaqëson një tjetër goditje ndaj arsimit të grave dhe vajzave në Afganistan, pas ndalimit të tyre për të ndjekur shkollimin përtej klasës së gjashtë. Në fund të vitit 2024, u mbyllën edhe kurset e mamisë, që ishin ndër të fundit forma të trajnimeve profesionale për vajzat. Po ashtu, janë ndaluar lëndët që shqyrtojnë rolin e gruas në shoqëri, përfshirë “Gjinia dhe Zhvillimi” dhe “Sociologjia e Gruas”.
Dokumentet e siguruara nga BBC Afghan zbulojnë se në listën prej 50 faqesh të librave të ndaluar figurojnë 310 libra të autorëve iranianë ose të botuar në Iran. Anëtarët e komitetit të rishikimit të librave kanë theksuar se ky ndalim ka për qëllim të “parandalojë ndikimin e përmbajtjeve iraniane” në arsimin e Afganistanit, në një periudhë kur marrëdhëniet mes dy vendeve janë tensionuar mbi çështje si uji dhe emigracioni.
Profesorë afganë shprehin shqetësim për pasojat e këtij vendimi, duke e quajtur të vështirë zëvendësimin e materialeve tashmë të ndaluara. Zakia Adeli, ish-zv.ministre e Drejtësisë dhe njëra nga autorët e ndaluar, tha se nuk ishte e habitur nga ky vendim. Ajo theksoi se është natyrale që zërat e grave përmes librave të shuhen kur ato nuk lejohen të studiojnë. Ky zhvillim është një shembull tjetër i kufizimeve gjithnjë e më të rënda ndaj të drejtave dhe lirisë së grave në Afganistan pas rikthimit të Talibanëve në pushtet.
