Manchester United ka bërë një lëvizje domethënëse duke arritur marrëveshjen me një nga talentet më të lakmuar të momentit, Geovany Quenda, një anësor i ri portugez që po formohet si një nga yjet e ardhshëm të futbollit botëror.
Manchester United thuhet se ka arritur marrëveshjen me Sporting Lisbona dhe djaloshi do t’u bashkohet “Djajve” në verën e ardhshme. Me këtë nënshkrim, tek United mendojnë të forcojnë një nga fushat që kanë më shumë nevojë për cilësi dhe, në planin afatgjatë, synon një lojtar të aftë për të bërë diferencën në krah.
Ndërkohë që Liverpool dhe disa klube të tjera të mëdha e ndiqnin nga afër, Manchester United kaloi përpara të gjithëve dhe arriti të sigurojë firmën e këtij lojtari.
Marrëveshja raportohet se është mbyllur për një shifër afër 50 milionë euro, një lëvizje që ka treguar qartë përkushtimin e “Djajve të Kuq” për të forcuar skuadrën e tyre me lojtarë të rinj me potencial të madh.
Geovany Quenda, që është ende një fëmijë, pasi nuk ka mbushur akoma 18-vjeç, po shkëlqen si në klubin e tij, Sporting Lisbon, ashtu edhe në ekipet e të rinjve të Portugalisë.
Stili i tij i lojës, i cili kombinon kreativitetin, inteligjencën taktike dhe aftësinë e madhe për të shpërndarë topin, ka tërhequr interesin e klubeve të mëdha evropiane, por United iu parapriu.
Me ardhjen e tij në “Old Trafford” të planifikuar për verën e ardhshme, pritshmëritë për performancën e Quenda-s janë shumë të larta. Ai është një nga premtimet e mëdha të futbollit evropian dhe nënshkrimi i tij nga Manchester United mund të shënojë fillimin e një epoke të artë për vetë lojtarin dhe klubin anglez.
