Një aksident i rëndë rrugor ka ndodhur mbrëmjen e sotme aksin Berat–Poliçan, ku një automjet tip Porsche ka dalë nga rruga dhe ka përfunduar në një përrua, duke shkaktuar humbjen e jetës së një personi dhe plagosjen e rëndë të dy të tjerëve.
Ngjarja ka ndodhur teksa mjeti po lëvizte në drejtim të Beratit. Sipas informacioneve paraprake, makina ka devijuar nga rruga në rrethana ende të paqarta dhe ka rënë nga ura, duke përfunduar në shtratin e përroit.
Në vendngjarje kanë mbërritur menjëherë forcat e Policisë Rrugore dhe ekipet e zjarrfikëses, të cilat kanë bërë të mundur nxjerrjen e automjetit të dëmtuar nga përroi, si dhe transportimin e të plagosurve në spital.
Fatkeqësisht, si pasojë e aksidentit ka humbur jetën drejtuesi i mjetit, Endri Vrushaj, 34-vjeç, banues në lagjen “Vakëf” të qytetit të Beratit. Ndërsa të plagosur rëndë kanë mbetur dy pasagjerët që ndodheshin në automjet, Alban Elezi, 36-vjeç dhe Gisi Shehu (i njohur gjithashtu si Kristi Greku), 37-vjeç, të dy banues në lagjen “Barrikadë” në Berat.
Fillimisht, të plagosurit u dërguan në Spitalin Rajonal të Beratit, por për shkak të gjendjes së rënduar shëndetësore, ata janë transportuar me urgjencë drejt Spitalit Ushtarak në Tiranë, ku ndodhen nën kujdes intensiv.
Policia ka nisur hetimet për të zbardhur rrethanat e plota të aksidentit, ndërsa dyshohet se shpejtësia dhe kushtet e rrugës mund të kenë qenë faktorë që çuan në humbjen e kontrollit të automjetit.
Ngjarja ka shkaktuar tronditje në komunitetin e Beratit, ndërsa familjarët e viktimës dhe të plagosurve ndodhen në gjendje të rëndë emocionale. Autoritetet bëjnë thirrje për kujdes të shtuar në qarkullim, veçanërisht gjatë orëve të mbrëmjes dhe në akse me rrezikshmëri të lartë.
