Shqipëria po hyn në një fazë të re të forcimit të kapaciteteve të saj mbrojtëse, duke synuar prodhimin vendas të armatimit. Ministri i Mbrojtjes, Pirro Vengu, bëri të ditur në Komisionin për Evropën dhe Punët e Jashtme se vendi ka nisur konkretisht ndërtimin e industrisë ushtarake përmes kontratave shtet-privat, që do të mundësojnë prodhimin e municioneve, armatimit të lehtë, dronëve dhe pajisjeve të tjera strategjike “Made in Albania”.
Vengu: Sa i përket industrisë ushtarake, jam i gatshëm që të bëjmë një sesion të posaçëm, një pjesë me dyer të japura, një pjesë me dyer të mbyllura, për ato elementë që duhet të ruajnë konfidencialitetin sepse janë prodhime armatimi për nevojat tona.
Kemi 6 kontrata të nënshkruara aktualisht për krijimin e 6 kompanive të përbashkëta shtet-privat përmes kompanisë shtetërore KAYO dhe 6 operatorëve privatë. 6 kontratat parashikojnë krijimin e municioneve, mjeteve pajisjeve personale, uniformave, armatimit të lehtë, dronëve, sistemeve antidronë dhe mjeteve të emergjencave civile.
Jemi në përfundim të negociatave për ringritjen e kantierit detar të Pashalimanit në bashkëpunim me gjigandin italian për të pasur mundësi të prodhojmë anijet tona, t’i mirëmbajmë dhe të prodhojmë dhe mirëmbajmë mjete për vendet aleate. Ky është spektri në të cilin po ecim. Presim që produktet e para “Made in Albania”, për mjetet taktike, të emergjencave dhe uniformave dhe municionet, prodhimet e para të fillojnë këtë vit. Ministria e Mbrojtjes është duke realizuar hapat përfundimtare për rishikimi strategjik të mbrojtjtes 2026.
