Presidenti francez Emmanuel Macron tha se garancitë e sigurisë për Ukrainën janë gati, ndërsa tha se Franca dhe aleatët e saj po kordinoheshin për sanksionet e mëtejshme kundër Rusisë në bashkëpunim me Shtetet e Bashkuara.
Macron tha se Rusia po përpiqet të vonojë procesin e paqes dhe të vazhdojë sulmet ndaj Ukrainës.
Siç shpjegoi Macron, garancitë e sigurisë tani janë gati, me përfshirje ushtarake dhe politike nga 35 anëtarë, me qëllim që t’i ofrojnë Ukrainës mbështetjen që i nevojitet.
“Argumenti kryesor këtu është se nuk ka kufizime në mbrojtjen e Ukrainës”, tha ai, duke theksuar nevojën për të “ringjallur” ushtrinë ukrainase për t’i “rezistuar” sulmeve ruse si dhe për të penguar sulmet e reja nga Moska.
Macron theksoi se shumë vende janë të gatshme të përfshihen “në tokë, në det ose në ajër” për të “siguruar qytetarët e Ukrainës dhe për të ruajtur armëpushimin pasi të zbatohet”, duke siguruar njëkohësisht paqen.
Presidenti francez konfirmoi se udhëheqësit kishin folur me Presidentin e SHBA-së Trump.
Në të njëjtën kohë, ai theksoi se “ne jemi gjithashtu të gatshëm të koordinojmë përpjekjet tona për të ndaluar veprimet luftarake të Rusisë”.
Macron nënvizoi se evropianët duan një sërë takimesh, fillimisht midis Zelenskyt dhe Putin dhe më vonë, nëse Moska nuk pranon t’i japë fund luftës do të detyrohen të marrin masa të mëtejshme me SHBA-në.
“Ne nuk mund të lejojmë shkeljen e së drejtës ndërkombëtare. Nuk mundemi, sepse kjo nuk shqetëson vetëm Ukrainën, por sigurinë e të gjithëve ne”, përfundoi Macron.
