Reshjet e pandërprera të 48 orëve të fundit po rëndojnë situatën në jug të vendit, ku lumi Vjosë ka dalë nga shtrati, duke shkaktuar përmbytje dhe rrezik për komunitetet pranë brigjeve.
Sipas raportimeve nga terreni, niveli i ujit në urën e Mifolit vijon të rritet me shpejtësi, duke detyruar ekipet e emergjencave të ndërhyjnë.
Në terren ndodhen forcat e emergjencave civile, efektivë policie dhe punonjës vendorë, të cilët po punojnë për forcimin e argjinaturës me synimin për të shmangur çarjen e saj dhe për të mbajtur ujin brenda shtratit.
Gjatë orëve të fundit janë evakuuar mbi 20 banorë, kryesisht nga shtëpitë pranë argjinaturës së kërcënuar, ndërsa të tjerë janë paralajmëruar të përgatiten për zhvendosje në rast përkeqësimi.
Ndërkohë, sipërfaqe të konsiderueshme tokash bujqësore janë nën ujë, ndërsa reshjet pritet të vazhdojnë edhe gjatë natës, duke rritur frikën për një përhapje më të madhe të përmbytjeve
