Një lumë i vogël në Buenos Aires, ka marrë një ngjyrë të kuqe të thellë, gjë e cila ka alarmuar banorët vendas.
Dyshohet se shkak për këtë situatë është bërë një rrjedhje boje nga një fabrikë aty pranë.
Ngjyra e lumit Sarandit, i cili kalon nëpër komunën e Avellaneda, gjashtë milje (9.6 km) në jug të kryeqytetit argjentinas, shqetësoi banorët, të cilët janë ankuar prej kohësh për ndotjen industriale në zonë.
Një gazetë lokale, La Verdad, raportoi se banorët kanë thënë se një erë e rëndë vinte nga uji dhe se ata dyshonin se fajtori ishte një fabrikë aty pranë.
Një banore, María Ducomls, tha se lumi dukej si “një rrjedhë e përgjakur” dhe se incidenti ishte i fundit në një seri episodesh të ngjashme. “Nuk ke nevojë të jesh inspektor për të kuptuar se sa i ndotur është Saranditi,” tha ajo për Agence France-Presse.
Ducomls, 52 vjeç, tha se familja e saj ishte zgjuar nga era keqe, duke shtuar se askush nuk kishte ofruar një shpjegim për ndotjen e vazhdueshme, pavarësisht të gjitha ankesave.
Ujërat e kuq, tha ajo, ishin rasti i fundit i ndotjes së Sarandës. “Ne e kemi parë atë në ngjyrë blu, të gjelbër, rozë dhe vjollcë, me një njollë yndyre në sipërfaqe që duket si vaj,” shtoi Ducomls.
Departamenti rajonal i mjedisit tha se po hetonte ngjarjen. “Në mëngjesin e së enjtes, 6 shkurt, morëm një raport se ujërat e kanalit të Sarandit ishin lyer me ngjyrë të kuqe”, thuhet në një deklaratë.
“Laboratori ynë i analizave u dërgua në zonë dhe u morën dy litra ujë si mostra për analiza bazë kimike dhe kromatografi të lëngshme për të përcaktuar se cila substancë ishte përgjegjëse. Mendohet se është një lloj ngjyrosje organike”, thuhet në deklaratë.
Një gazetar i AFP, raportoi se ngjyra e ujërave ishte zbehur vonë të enjten pasdite.
