Autoriteti Kombëtar i Ushqimit ka reaguar pas zbulimit të një sasie prej 52 kg luleshtrydhe të importuara nga Greqia, të cilat rezultuan me nivele pesticidësh mbi normat e lejuara.
Produkti iu nënshtrua analizave laboratorike më 17 shkurt, në kuadër të planit të monitorimit me bazë rreziku. Megjithatë, deri në daljen e rezultateve, e gjithë sasia është shpërndarë dhe shitur në treg.
Për këtë arsye, AKU ka klasifikuar luleshtrydhet si produkt me risk të lartë dhe ka urdhëruar masa të menjëhershme për parandalimin e rasteve të ngjashme.
Si pjesë e këtyre masave, 10 ngarkesa të tjera të njëpasnjëshme me luleshtrydhe nga Greqia janë bllokuar në kufi dhe nuk do të lejohen të hyjnë në treg deri në përfundimin e analizave laboratorike.
Në bazë të rezultateve, do të vendoset nëse importet e këtij produkti do të lejohen apo do të ndalohen për tregtim brenda vendit.
