PSG u mposht 1–0 nga Monaco dhe trajneri Luis Enrique u largua nga “Stade Louis II” i tensionuar dhe i zemëruar, duke e cilësuar paraqitjen e ekipit si “më të dobëtën e sezonit”.
Reagimi i ashpër i trajnerit
Duke folur për beIN Sports dhe më pas në konferencë për shtyp, Enrique nuk kurseu kritikat:
“Kur bën kaq shumë gabime, është e pamundur të fitosh. Nuk meritonim më shumë. Ishte ndeshja më e keqe e sezonit.”
PSG vuajti gjatë gjithë 90 minutave përballë presionit të lartë të Monacos, dhe goli i Minamino-s në minutën e 70-të mjaftoi t’i jepte kampionëve të Europës humbjen e dytë në Ligue 1 këtë sezon—po aq sa vitin e kaluar. Nëse Lens fiton të dielën, PSG mund të humbasë kreun e renditjes.
“Gabimet individuale na fundosën”
Enrique pranoi mungesën e qartësisë dhe ritmit:
“Ishte shumë e vështirë. Gabimet individuale na shkatërruan. Do të ishte e lehtë të thosha se skuadra ishte e lodhur, por duhet të jemi më të mirë çdo ditë.”
Gazeta prestigjioze franceze L’Équipe i dha spanjollit një vlerësim negativ për formacionin dhe zëvendësimet, duke shkruar:
“Vendosi të luante me formacionin titullar para një ndeshjeje të rëndësishme në Champions. Vendim jo i mençur.”
Episodi i fortë në minutën e 11-të
Një moment i nxehtë ndodhi kur Camara i Monacos ndërhyri rëndë ndaj portierit Chevalier. Trajneri refuzoi të komentonte, por tha se portieri ishte “shumë me fat” që mundi të vazhdonte pas ndërhyrjes dhe pesë minutave ndihmë mjekësore.
Lodhja dhe dëmtimet po e godasin PSG-në
Skuadra po ndjen efektet e kalendarit të ngjeshur. Hakimi, Doué dhe Nuno Mendes – tre titullarë të padiskutueshëm – munguan për shkak dëmtimesh, duke e rënduar edhe më shumë situatën.
Edhe pse PSG mbetet lider në Ligue 1 dhe i dyti në grupin e Champions League, tensioni te Luis Enrique po rritet, dhe paraqitja zhgënjyese në Monaco e theksoi edhe një herë lodhjen dhe mungesën e qartësisë së ekipit.
